DOBAR VAN DAN, TETI I DEČINO DRAGA!

NAŠLI SMO SE DANASKA DA BIMO MALO POĆAKULALI,
NAJNOVEJU OSUDU PUSTU NAŠEMU
ZLOĆKU KUPUSIĆU PROČITALI
I SE ČA GOD (I KEGA GOD) JOŠ USPUT OŠPOTALI!
I OVO SE J' LETO ČUDA LEPEGA DOGODILO,
JOŠ VIŠE BEDASTOĆ I ŠKERCI PUL SEH NAS JE BILO,
A BOME SE JE FANJ TEGA OD LANE PROMENILO!
PA DA PAK NAJZAD I REČEMO ZAČ OVEGA BRIŽNIĆA,
ZLOĆKA KUPUSIĆA, DANASKA RASTEŽEMO,
DA POBROJIMO ČA JE SE GRDEGA STORIL I DA SI SKUPA
POVEDEMO ZAČ JE KRIV.
NA MOJ ZNAK, SI SKUPA GLASNO RECITE: KRIV JE!

NAŠ OVOLETNJI PUST KRIV JE:
AŠ VAS JE BOLELO UHO, TRBUH, GLAVA, RUKE I NOGI,
PA STE RABILI POĆ PUL DUHTORA. KRIV JE!

KRIV JE I ČA STE PADALI PO STEPENICAH,
UGANULI NOGI DVAPUT, IMELI PROLJEVI I TEMPERATURI,
BILI PREHLAJENI, ŠMRCAVI, KAŠLJAVI,
MRZOVOLJNI I PLAČLJIVI. KRIV JE!

KRIV JE I ZATO AŠ SU VAS MAMI, TATI, NONE I NONIĆI
JADILI, ZIJALI NA VAS, NA ROJENDANI POZABILI
NISU VAN KUPILI BOMBONI, CIKULADI I ŽVAKI,
NEGO STE MORALI JIST BROKULI, ŠPINACU I KAKI. KRIV JE!

PUST JE I GLAVNI KRIVAC
ČA OD PASANEGA LETA NIMATE SE IGRAČKI NA BROJU,
ČA SU SE GUME NA BICIKLE PROBUŠILE, LOPTE SE ZGUBILE, BEBE BEZ ROBICE BILE. KRIV JE!

KRIV JE I ČA STE VA KOŠARKE I NOGOMETE ZGUBILI,
ČA NISTE PAŽLJIVEJI BILI,
ČA STE SE ONDA JADILI
I PRIJATELI UDRILI . KRIV JE!

KRIV JE AŠ SU TETI BOLNE I UMORNE BILE,
NA VAS SE BRIŽNE JADILE,
GOVORILE DA SE BLESIRATE I GLUPIRATE
I NIKEGA NA SVETE NE SLUŠATE. KRIV JE!

KRIV JE, JA,
ZA SE TO I JOŠ ČUDA TEGA
PA ĆE, PO DOBROJ STAROJ UŽANCE
OVO LETO, KOT I SAKO
NAŠ PUST ZLOĆKO KUPUSIĆ
PLATIT I Z OVEGA SVETA PARTIT.
I ZATO…….VAŽGIMO GA!